Það kemur í sjálfu sér lítið á óvart að Björgvin Guðmundsson sé gerður að ritstjóra Viðskiptablaðsins. Hann hefur verið gera góða hluti og var yfirmaður þeirra á Morgunblaðinu sem fluttu sig yfir. Þá liggur það fyrir að hann hefur lengi verið í nánum tengslum við eigendur blaðsins og er án efa sá sem þeir vilja, enda var maður hálfhissa að hann skuli ekki frá upphafi hafa verið með ritstjóratitilinn.

——

Mónitor kom í fyrsta skipti út með Morgunblaðinu í dag. Þetta er fínasta blað, enda ekki við öðru að búast hjá Birni Braga. En það er spurning hversu langlíf þessi útgáfa verður.

Þetta er þriðja tilraunin sem Morgunblaðið gerir til útgáfu á dægurblaði fyrir ungt fólk sem dreift er með blaðinu. Sú fyrsta var 24/7 fyrir kannski 7-8 árum, og fyrir 3-4 árum var Málið gefið út. Hvorug útgáfan virtist ganga upp, og maður áttar sig ekki á því af hverju það ætti að ganga betur núna þegar auglýsingamarkaður er mjög takmarkaður og áskrifendur Morgunblaðsins enn færri en í síðustu atlögum.

——

Maður áttar sig ekki á því hvernig ÁJF datt í hug að reyna að ljúga til um útlendingaröðina, eftir að hafa tjáð sig um hana við blaðamann - þeir taka í langflestum tilvikum öll samtöl upp. Hefði ekki verið betra að viðurkenna einfaldlega að þetta hefðu verið mistök og að leitað yrði annarra leiða til að hjálpa einstæðum mæðrum, eldri borgurum eða fötluðum að stytta biðtímann.

—–

Annars eru slæmu fréttir dagsins þær að nýtt stríð hefur brotist út á milli Samtaka atvinnulífsins og Alþýðusambands Íslands. Góðu fréttirnar eru hins vegar þær að enn sem komið er hefur aðeins verið tekist á um það hvorum tekst að finna langsóttari ástæður til að segja sig frá Stöðugleikasáttmálanum. …

—–

Ein af merkilegri fréttum landsins er að eitt merkasta frumkvæði síðari ára sé nú formlega orðið ríkisrekið. Útflutningsskrifstofa íslenskrar tónlistar (ÚTÓN) mun nú næstu fimm árin sjá um tónlistarhátíðina Iceland Airwaves, en áður sá Hr. Örlygur/Mr. Destiny um hana. Orðið á götunni er hins vegar að í rauninni muni Þorsteinn Stephensen og co. hjá Örlygi áfram sjá um hátíðina, en með ÚTÓN eigi að vera yfir hátíðinni til að tryggja hún nýtist sem best til að markaðssetja íslenska tónlist erlendis. Sjáum til hvað verður.

—–

Og að lokum: Pressan birti í fyrradag frétt um 8 ára pókersnilling sem fær ekki greiddan 57 milljón króna vinning.  Ef marka má þessa umræðu á íslenska pókervefnum 52.is er þetta lygasaga sem byrjaði að ganga á netinu fyrir hálfum mánuði eða svo.

Jæja, nú vantar mig gáfuleg innlegg frá tölvu- og tækjagúrúum.

Ég á rúmlega ársgamla Toshiba tölvu sem keyrir á Windows Vista. Hún “bluescreenar” undireins þegar ég tengi hana við flakkara sem ég á frá fyrri tíð, og á villumeldingunni má skilja að það sé windows sem slökkvi á öllu til að koma í veg fyrir skemmdir.

Flakkarinn geymir fyrst og fremst öryggisafrit og gömul gögn, og þar sem mig hefur ekki vantað neitt af honum fyrr en núna hef ég ekki gert neitt í þessu, fyrr en í gær, þegar ég leit við hjá tölvulögnum félaga. Hann grunaði að flakkaraboxið væri etv búið að skemmast - en eftir nokkrar tilraunir varð hann alveg ráðalaus, og orðlaus líka.

Í stuttu máli var ekkert að harðadisknum og heldur ekki flakkaranum. Við tengdum hann við makka og aðra PC tölvu, sem keyrði á windows XP, og það komu engin vandamál upp. Mín tölva var líka tengd við annan flakkara, og nokkra USB lykla sem gekk með öllu áfallalaust fyrir sig.

Þannig að tölvan mín er í besta lagi og þessi tiltekni flakkari er í fullkomnu lagi líka. Nema að þau virðast ómögulega geta talað saman. Einhver sem getur útskýrt hvert vandamálið gæti verið, og þá ekki síður hvað ég get gert í málinu?

Það verður eftirsjá að Henrý Þór af Pressunni - Gula Pressan er búinn að vera fastur punktur hjá mér, frekar en Pressan, þar sem maður hefur frekar farið inn af fyrirsögnum á gáttinni.

Það er oft lítill markaður fyrir það sem rúmast ekki inni í boxinu.

Hannes segist hafa ráðfært sig við Gunnlaug Sævar, og skrifað Davíði Oddssyni bréf til að útskýra afstöðu sína til Falun Gong mótmælanna frekar. Heldur hann í alvörunni að þetta sannfæri menn um að frásögn Hreins sé uppspuni frá rótum, eða því sem næst? Síðast þegar ég vissi var það sérsvið skrímsladeildarinnar, og hyggilegt prinsippatriði að ljúga aldrei, bara með hálfsannleik og orðhengilshætti.

Þessi deila þeirra er annars að opinbera takmörk hugmyndarinnar um frjálsan markað. Báðir aðilar tapa meira eftir því sem þetta heldur lengur áfram og samt geta þeir ekki samið um að hætta þessu. Epískt.

—–

Talandi um Falun Gong. Nokkrum vikum eftir mótmælin kom skoska landsliðið í fótbolta hingað til að leika við það íslenska og Már Örlygsson skrifaði þetta flotta ádeilublogg sem einhverjir muna sjálfsagt eftir.  Alger klassík.

Af nýlegri gæðapistlum hlýtur maður að benda á Deiglupistil Þórlinds Kjartanssonar í dag: Ég vaknaði ekki of seint. Dagurinn byrjaði of snemma.

—–

Gunnar I. Birgisson fallinn - það eru í sjálfu sér stórtíðindi. Leitt að hann skuli ekki geta tapað með reisn.

Hann er áreiðanlega að íhuga sérframboð, eða í það minnsta að leiða hugann að því. Hann er ekki týpan sem gefst auðveldlega upp. Efast samt um að hann kýli á það, enda vandfundinn sá flokkur sem hefur minni þolinmæði gagnvart slíku en íhaldið. Þó Gunnar sé um margt öflugur er hann enginn Albert Guðmundsson, og þar að auki hlýtur hann að átta sig á því að það er engin leið fyrir hann að ná bæjarstjórastólnum með slíku framboði, jafnvel þó allt heppnist eins og best verður á kosið.

—–

Horfði á Gettu Betur í gær og sárnaði það fyrir hönd bernskuslóðanna að hvorugt liðið gat giskað á hvaða nesi Haffjarðará og Straumfjarðará tilheyrðu. Hélt að örnefni væru eitt af því sem væri æft í þaula. Það er ekki eins og Haffjarðaráin sé einhver smáspræna.

—-

Björn.is fagnar fimmtán ára bloggafmæli. Ég verð að viðurkenna að ég hef aldrei litið á Björn sem bloggara, enda get ég ekki séð að skrif verði sjálfkrafa blogg þó þau birtist á netsíðu og að skrifað sé með reglulegum hætti. Þessi skrif eru frekar í ætt við pólitíska pistla að formi til. Hann fær samt prik fyrir dugnaðinn. [Edit:  Björn talar ekki sjálfur um blogg, heldur tók ég það upp að óathuguðu máli af linkafyrirsögninni á Eyjunni sem segir: "Met. Björn hefur bloggað í 15 ár" . ]

—-

Aftur í Falun Gong mótmælin. Hér er auglýsingin fræga, eða .pdf af henni (SBS fær þakkir fyrir að benda mér á linkinn). Ég var ekki viss um það hvort ég hefði verið á henni á sínum tíma, og var ánægður að hitta mig fyrir í svo góðum hópi fólks. ;)

Það er víst búin að vera að flakka saga í dag um að einhverjir óprúttnir aðilar, jafnvel frá Valhöll, hafi tekið sig til og komist yfir félagatal Samfylkingarinnar vegna ágallans í netprófkjörinu.

Tæknilega er slíkt forrit tiltölulega einfalt og fljótskrifað - það er nokkuð algengt menn skrifi ýmis smáforrit til að sækja fyrir sig gögn. Hins vegar er ekki hægt að gera það sporlaust, heldur er tiltölulega auðvelt að finna hvaðan gögnin eru sótt ef sama IP-talan er að fletta upp hátt í 300.000 manns.

Vandinn við kenninguna er tilgangurinn - það er í rauninni enginn sérstakur akkur í því fyrir Sjálfstæðisflokkinn að komast yfir þessi gögn.

Félagatal flokkanna hefur mest gildi í innanflokkskosningum af einhverju tagi, einkum í átökum eða valdabaráttu, enda kjörskrá, samanber til dæmis gagnrýnina frá Vinstri grænum í NV kjördæmi, þar sem Jón Bjarnason virðist hafa haft aðgang að félagatali sem aðrir höfðu ekki.

En eftir því sem ég kemst næst fá frambjóðendur í Samfylkingunni aðgang að þessum gögnum þegar um prófkjör eða annað álíka er að ræða.

Þá hefðu VG og Framsóknarflokkurinn meiri hag af þessu en Sjálfstæðisflokkurinn þar sem innbyrðis skörun kjósendahópa milli þessara flokka er meiri. Það er að segja, skráðir Samfylkingarmenn myndu fæstir fást til að kjósa Íhaldið á góðum degi, en hinir tveir flokkarnir gætu ef til vill lokkað fáeina til sín. Samt ekki marga, og flestir sæmilega hæfir kosningastjórar mundu telja að tímanum yrði betur varið í að eltast við aðra kjósendur en nákvæmlega þá sem menn beinlínis vita að eru flokksbundnir annars staðar.

Það væri klárt brot á persónuverndarlögum fyrir aðra en flokksskrifstofur að geyma gögn af þessu tagi. Ef ég man rétt er flokkunum sjálfum óheimilt að afhenda nokkrum félagsmanni rafrænt félagatal út úr húsi, til að koma í veg fyrir að pólitískar skoðanir einstaklinga séu til á gagnagrunnum úti í bæ. Þeir fá félagatalið einungis á pappír, sem oftast er það dökkur að ekki er hægt að ljósrita hann eða skanna með góðu móti. Og verða að gera svo vel að skila því að loknu prófkjöri. Þannig að fyrir einhverja kosningamaskínu innan samfylkingarinnar myndu fást þau þægindi að menn gætu lesið félagatalið anno 2009 (það úreldist fljótt) af tölvuskjá. Frekar langsótt.

Sumsé: Það er vel mögulegt að einhverjir hafi stokkið til. En það hefði þá líklega bara verið til að segja frá því. Tæknilega er þetta lítið mál, en ég átta mig bara ekki á því hvað menn hefðu talið sig vera að græða á uppátækinu.

Er einhver þarna úti sem á endurvarpa (repeater) fyrir þráðlaust net sem hann gæti hugsað sér að losna við? Kontaktupplýsingar mega einfaldlega fara í kommentakerfið. ;)

Ég er orðinn leiður á Davíð og Seðlabankanum, og það sem af er vikunnar stendur það einkum upp úr að Ólafur Ragnar Grímsson er asni - og menn geta flett því upp í leitarvélinni neðst til hægri hversu tamt mér að nota orðalag af þessu tagi.

Hann var slæmur sem útrásarvíkingur, en hérumbil verri sem maður fólksins. Bendi annars á Baldur McQeen, sem er með ágætis pælingar.

Ég er hins vegar frá og með gærdeginum kolfallinn fyrir forsetafrúnni og hyggst veita því sérstaka athygli hvernig sambandi þeirra vindur fram. ;)

Við byrjum á skoðanakönnun:

 Loading ...