Það verður eftirsjá að Henrý Þór af Pressunni - Gula Pressan er búinn að vera fastur punktur hjá mér, frekar en Pressan, þar sem maður hefur frekar farið inn af fyrirsögnum á gáttinni.

Það er oft lítill markaður fyrir það sem rúmast ekki inni í boxinu.

Jónas Kristjánsson hæðist af sínu alkunna lítillæti af þeirri hugmynd að hestar sem þekkja mannalykt verði þjálfaðir til björgunarstarfa.

Hef lítið vit á hestum, enda á ég svo fáa, að ég get talið þá. Því kom flatt upp á mig, að þjálfa ætti þefhesta til að finna týnt fólk á fjöllum. Forsíða Fréttablaðsins fjallaði um þetta í gær. Skildist mér, að gangnahestar séu nærri því að þefa fé uppi í haustleitum. Fræði, sem ég hef aldrei heyrt. Brá mér á Google og fann ekkert um þetta, svo að þetta er líklega uppfinning í Borgarbyggð. Fleiri húsdýr en hestar hafa dulda hæfileika. Ég hef lengi haft áhuga á að selja sauðfé til erlendra herja. Kindur hafa dulda hæfileika til að komast yfir rimlahlið og gaddavírsgirðingar. Gagnlegur kostur í innrásum.

Líklega er Jónas ekkert séní þegar kemur að notkun leitarvéla. Ég fór á google og sló inn “searh horse finds people by smell” og þar kom þessi grein í 8. sæti.

Þannig að teljararnir eru ekki einu notforritin þar sem Jónas.is gæti aukið við kunnáttu sína. Og þó hann eigi allþónokkra hesta getur hann greinilega lært sitthvað fleira um þá líka - enda alltaf gaman að hafa augun opin og læra nýja hluti. ;)

Gunnar I Birgisson rýfur loksins þögnina. Mér sýnist flest það sem hann segir flokkast undir það sem á góðri íslensku nefnist væl -eða eigum við að segja píkuskrækir?.

Í stuttu máli gengur þetta út á:

a) Það var talað illa um hann í prófkjörsbaráttunni.
b) Það var smalað í flokkinn fólki sem kaus hann EKKI - og það í allþónokkru magni.
c) Það kaus fólk í prófkjörinu sem líka er skráð í aðra flokka.

Nú þætti mér gaman að vita hvort einhver langminnugur lesandi geti fundið bara eitt dæmi um einstakling sem orðið hefur undir í sambærilegum oddvitaslag í stjórnmálaflokk án þess að eitthvað af þessum atriðum eigi líka við um hann - og þá á ég ekki bara við prófkjörsslagi!

(Og að því sögðu er rétt að ég viðurkenni góðfúslega að hafa kosið í prófkjörum bæði hjá Íhaldinu og Samfylkingunni, því ég er svo mikill svindlari.

Auk þess var ég á 1. ári í menntaskóla  skráður í Alþýðubandalagið til að fjölga þingfulltrúum sem gæti kosið Steingrím J. frekar en Margréti Frímannsdóttir. Sá sem skráði mig er í dag mektarmaður í sjálfstæðisflokknum í sinni heimabyggð, svo það er engin ástæða til að nafngreina hann. ;)

Og jú, það var eitthvað fleira. Til að mynda tóku forystumenn íþróttafélagsins í bænum afstöðu gegn honum, og Baugsmiðlarnir voru að skrifa fréttir um hann - sem þó hafði ekki gert neitt rangt. Aumingja Gunnar.

Maður ætti kannski frekar að benda á það sem Gunnar sagði ekki eða láðist í það minnsta að geta.

a) Að reglur flokksins hefðu verið brotnar, þ.e. að svindl í lögformlegri merkingu þess orðs hefðu átt sér stað.
b) Hvaða forystumenn annarra flokka hefðu skipulagt smölun gegn sér.
c) Að einhver aðstöðumunur hefði verið milli frambjóðenda, þ.e. að annar frambjóðandi hefði haft betri aðgang að gögnum, eða meiri völd í flokksfélaginu á staðnum og þar af leiðandi í aðstöðu til að láta framkvæmd kosninganna vera sér í hag (líklega sleppir hann því þar hann var sjálfur í betri aðstöðu en Ármann).

Flestir sæmilega skynsamir stjórnmálamenn hafa vit á því eftir ósigur að bíta á jaxlinn, hringja í andstæðinginn og óska honum til hamingju, og jafnvel að tala upp listann í fjölmiðlum. Ekki af því þeir séu sáttir innst inni eða af því þeir hafi ekki verið beittir rangindum í kosningabaráttunni, heldur átta þeir sig á því að það þjónar þeirra pólitísku hagsmunum betur.

Gunnar er á leiðinni í misráðið ferðalag, sem hefur eingan taktískan tilgang. Hann er ekki að fara að ná neinu fram sem kemur honum pólitískt betur til skemmri eða lengri tíma, eða ég get í það minnsta ekki ekki séð hvað það ætti að vera. Þvert á móti myndi maður halda að þessi uppátæki geti fækkað hans eigin stuðningsmönnum - að maður tali nú ekki um þegar hann leyfir vangaveltum um sérframboð að grassera. Áttar hann sig ef til vill ekki á því að einhverjir þeirra hafa nú mestar áhyggjur af eigin stöðu í breyttu valdalandslagi, og eru jafnvel að leita leiða til að komast innundir hjá nýjum mönnum í borgarstjórn?

Þetta meikar sumsé engan sens, er alls ekki gáfuleg pólitík og enn betra fyrir vinstri öflin í Kópavogi.

Kunningi minn benti mér á þetta forvitnilega myndband þar sem það sést svart á hvítu hvernig Samfylkingaroddvitinn Guðríður Arnardóttir fyrirkemur Gunnari I. Birgissyni!

Hannes segist hafa ráðfært sig við Gunnlaug Sævar, og skrifað Davíði Oddssyni bréf til að útskýra afstöðu sína til Falun Gong mótmælanna frekar. Heldur hann í alvörunni að þetta sannfæri menn um að frásögn Hreins sé uppspuni frá rótum, eða því sem næst? Síðast þegar ég vissi var það sérsvið skrímsladeildarinnar, og hyggilegt prinsippatriði að ljúga aldrei, bara með hálfsannleik og orðhengilshætti.

Þessi deila þeirra er annars að opinbera takmörk hugmyndarinnar um frjálsan markað. Báðir aðilar tapa meira eftir því sem þetta heldur lengur áfram og samt geta þeir ekki samið um að hætta þessu. Epískt.

—–

Talandi um Falun Gong. Nokkrum vikum eftir mótmælin kom skoska landsliðið í fótbolta hingað til að leika við það íslenska og Már Örlygsson skrifaði þetta flotta ádeilublogg sem einhverjir muna sjálfsagt eftir.  Alger klassík.

Af nýlegri gæðapistlum hlýtur maður að benda á Deiglupistil Þórlinds Kjartanssonar í dag: Ég vaknaði ekki of seint. Dagurinn byrjaði of snemma.

—–

Gunnar I. Birgisson fallinn - það eru í sjálfu sér stórtíðindi. Leitt að hann skuli ekki geta tapað með reisn.

Hann er áreiðanlega að íhuga sérframboð, eða í það minnsta að leiða hugann að því. Hann er ekki týpan sem gefst auðveldlega upp. Efast samt um að hann kýli á það, enda vandfundinn sá flokkur sem hefur minni þolinmæði gagnvart slíku en íhaldið. Þó Gunnar sé um margt öflugur er hann enginn Albert Guðmundsson, og þar að auki hlýtur hann að átta sig á því að það er engin leið fyrir hann að ná bæjarstjórastólnum með slíku framboði, jafnvel þó allt heppnist eins og best verður á kosið.

—–

Horfði á Gettu Betur í gær og sárnaði það fyrir hönd bernskuslóðanna að hvorugt liðið gat giskað á hvaða nesi Haffjarðará og Straumfjarðará tilheyrðu. Hélt að örnefni væru eitt af því sem væri æft í þaula. Það er ekki eins og Haffjarðaráin sé einhver smáspræna.

—-

Björn.is fagnar fimmtán ára bloggafmæli. Ég verð að viðurkenna að ég hef aldrei litið á Björn sem bloggara, enda get ég ekki séð að skrif verði sjálfkrafa blogg þó þau birtist á netsíðu og að skrifað sé með reglulegum hætti. Þessi skrif eru frekar í ætt við pólitíska pistla að formi til. Hann fær samt prik fyrir dugnaðinn. [Edit:  Björn talar ekki sjálfur um blogg, heldur tók ég það upp að óathuguðu máli af linkafyrirsögninni á Eyjunni sem segir: "Met. Björn hefur bloggað í 15 ár" . ]

—-

Aftur í Falun Gong mótmælin. Hér er auglýsingin fræga, eða .pdf af henni (SBS fær þakkir fyrir að benda mér á linkinn). Ég var ekki viss um það hvort ég hefði verið á henni á sínum tíma, og var ánægður að hitta mig fyrir í svo góðum hópi fólks. ;)

Ég ætla ekki að þykjast hafa hugmynd hvort sannleikskorn sé í kommenti Hreins Loftssonar sem allir eru að lesa í dag. Það skiptir ekki máli hvort heldur er, honum er enginn sómi í því að birta svona sögur, enda nokkuð augljóst að þetta hefur engan annan tilgang að koma höggi á Hannes og kannski líka að senda fyrrum vinum sínum einhvers konar skilaboð.

Ef að Hreinn væri hóra eða klámmyndaleikkona að selja gulu blaði upplýsingar um framhjáhald einhvers stórleiðtoga gæti maður í það minnsta sagt honum til afsökunar að líklega væri hann að fá góða fjárhæð fyrir þetta - en ég veit ekki hvernig er hægt að útskýra þetta. Það eru engar upplýsingar að koma fram hér sem varpa nýju ljósi á Davíð Oddsson, og þaðan af síður verið er þetta “whistle blowing” um djúpfeðmt spillingarmál.  Það er erfitt að sjá að þetta komi okkur eitthvað sérstaklega mikið við.

Auðvitað elska allir að hata Hannes Hólmstein, og njóta þess að sjá hann í hjákátlegu ljósi. En eftir sem áður er nokkuð augljóst að þau samtöl sé Hreinn er að greina frá, hvort sem þau eru ósönn eða ekki, eru einkasamtöl, sem fara fram í trúnaði og sum hver eru viðkvæm og mjög persónuleg.  Maður hefði haldið að þetta væri “off limit” fyrir gamla trúnaðarvini þó að fyrri vinátta sé fyrir bí.

Það væri ólíkt göfugra ef að Hreinn Loftsson, sem er um margt í sérstakri stöðu og innherji bæði hjá Davíðs- og Baugsmönnum, myndi deila með almenningi trúnaðarupplýsingum um konkrít mál og stefnumarkanda ákvarðanir sem hafa varðað flesta landsmenn. Hann á margt ósagt, þó hann eigi sinn eigin fjölmiðil, og hefur augljóslega ákveðið að segja minna en meira um það. En skirrist ekki undan því að velta sér upp úr lágkúrunni.

Það hljóta einhverjir fleiri en ég að vera orðnir þreyttir á því að umræðan hérna snúist um einhverja persónulega fýlu milli aðstoðarmanna og hægrihanda lykilleikmanna. …